Nyus i kam long MP mo Pati
Parliament of the Republic of Vanuatu

Gavman i wantem saspendem mi long Palemen

Olgeta –

Gavman “caucas” (miting blong evri MP long Gavman saed) i bin mit long Tyusde long aftenun mo long miting ia i bin gat wan resolusen blong putum wan mosen blong saspendem mi long Palemen.

Mi no save wanem risen nao oli wantem saspendem mi long Palemen from.
Mi no brekem Konstityusen, o traem blong brekem Konstityusen, mo i nogat eni alegesen se mi brekem Konstityusen.
Mi no brekem loa, o traem blong brekem loa, mo i nogat eni alegesen se mi brekem loa.
Mi no brekem Leadership Code, o traem blong brekem Leadership Code, mo i nogat eni alegesen se mi brekem Leadership Code.
Mi no brekem ol Standing Orders blong Palemen, o traem blong brekem ol Standing Orders, mo i nogat eni alegesen se mi brekem ol Standing Orders.
Mi no tok nogud agensem eni narafala MP, mo mi no giaman abaot eni narafala MP.
So wanem risen i gat blong saspendem mi?Mi karem ansa long wan nyus blong Radio New Zealand International we oli mekem intaviu wetem Spika blong Palemen mo hemi talem se “The coalition accuses Mr Regenvanu of destabilising the country by presenting no-confidence motions when the opposition hasn’t got the number in parliament to vote them through”.
Yu save ridim nyus ripot blong Radio New Zealand long http://www.rnzi.com/pages/news.php?op=read&id=74633
Be sipos hemia nao risen, mi gat sam moa kwestin:

Long las Mosen blong Nogat Trast long Novemba 2012, MP we hemi muvum Mosen hemi Natapei, MP we i sekendem Mosen hemi Serge, mo 27 MP oli saenem (mi mi wan).  Long Mosen we mifala jas dipositim, MP we hemi muvum Mosen hemi Natapei, MP we i sekendem Mosen hemi mi, mo 16 MP oli saenem.
So from wanem Gavman i targetem mi wan nomo from ol mosen ia? Olsem wanem long Natapei we hem nao i muva blong tufala mosen tugeta? Olsem wanem long Serge we hemi saenem wan mo sekondem narafala wan, semak olsem we mi mi mekem? Olsem wanem long evri 27 mo 16 MP we oli saenem tugeta mosen?I pas pas we…
Be hemia blong infomesen blong yumi nomo – mi no wari tumas long mosen ia at this stage….
Ta, Ralph Regenvanu.

 

 

Leave a Reply

Your email address will not be published. Required fields are marked *