Solomon Islands imas tingting gut long fiuja bihain long RAMSI

Updated 25 July 2013, 16:26 AEST

Sam Seke

Prime Minister Gordon Darcy Lilo wantaim nabawan na nau Special Coordinator blong RAMSI i askim pipol blong Solomon Islands long tingting gutpela long fiuja blong kantri.

solomon ramsi

Ol yangpela tu i hamamas long wok blong RAMSI long Solomon Islands (Credit: ABC)
Odio: Prime Minister Lilo; Ramsi bos bipo Nick Warner na Ramsi bos nau ia Nicholas Coppel i toktok

Oli mekim dispela singaut long wanpela semina long Honiara tede we sampela yut lida na sumatin tu i go longen, blong lukluk long fiuja blong Solomon Islands bihain long dispela Regional Assistance Mission i lusim kantri.

Taim em i toktok long semina, nabawan bos blong Ramsi, Nick Warner itok, oli bin go pudaun long balus long Honiara long naba 24 long July, 2003  wantaim 1,700 soldjia na 300 polis ofisa.

Mr Warner itok long taim ia oli kamap long ples we igat planti korapsen, ikonomi i bagarap na planti still na kriminol lain i save raun wantaim gan.

Em itok em bai no lus tingting long lukim tu planti pipol ibin go bungim ol military na polis fos blong RAMSI taim oli kamap long Henderson Airpot.

Blong pinisim toktok blongen, nabawan Special Coordinator blong RAMSI Nick Warner itok – pipol long Solomon Islands i mas tingim ol gutpela wok we i kamap pinis, lainim long mistek na ino kem bagarapim ken ol gutpela wok i stap.

Na Prime Minister Gordorn Darcy Lilo i tokim ol pipol long semina olsem Solomon Islands i fesim yet planti ol kainkain challenge long development blongen.

Em i tok kantri i nidim risois long kamapim ikonomi blong kantri na em i askim ol landona long mekim investment long graun blong ol.

Prime Minister Lilo itok, Solomon Islands imas save gut olsem belkros na pait bai nonap bringim wanpela gutpela samting long kantri.

Special Coordinator blong RAMSI nau ia, Nicholas Coppel i tok semina em ino blong toktok long wanem samting RAMSI ibin wokim long insait tenpela yar igo.
Em blong lukluk long wanem samting blong mekim kantri i kamap gutpela insait long narapela ten pela yar ikam.

Mr Coppel itok em i save bai Solomon Islands i kamap wantaim ol gutpela tingting long fiuja blong kantri.http://www.radioaustralia.net.au/

Leave a Reply

Your email address will not be published. Required fields are marked *